Arranged by Mr. R. A. Smith.
OH, sair I rue the witless wish,
That gart me gang wi you at e'en ;
An sair I rue the birken bush,
That screent us wi its leaves sae green:
An tho ye vow'd ye wad be mine,
The tear o grief aye dims my e'e ;
For, oh ! I'm fear'd that I may tyne
The luve that ye hae promis'd me !
While ithers seek their e'ening sports,
I wander, dowie, a my lane,
For whan I join their glad resorts,
Their daffin gies me meikle pain.
Alas, it wasna sae shortsyne,
Whan a my nichts war spent wi glee ;
But, oh ! I'm fear't that I may tyne
The luve that ye hae promis'd me !
Dear lassie, keep thy heart aboon,
For I hae wairt my winter's fee;
I've caft a bonnie silken goun,
Tae be a bridal gift for thee.
An sooner shall the hills fa doun,
An mountain hie shall stan the sea,
Ere I'd accept a gouden croun,
Tae change that luve I bear for thee.
[Semple 131]